من بداية 2020 ولما كتبت اهداف السنة كان من بينهم ان اعمل رياضة اقل شي 3 مرات بالأسبوع وفعلا بديت وكانت متفرقة على أيام الأسبوع وكنت مو متأكدة من نفسي بالإستمرار،  بالتالي ما حشترك بجيم او اعمل اي مجهود زائد حمشي بالتساهيل.

الي حصل إن فعلا التزمت وبديت من بداية 2020 وبعدها صار وداهمتنا  كورونا وبدأ الحجر، وبدت الأيام تزيد تبع الرياضة بإنتهاء فترة الحجر كانت النتيجة فتاكة.

نعم فتاكة، طيب نبال ماشاء الله شكل الجسم بدأ فيه تغير وبشهادة كل من حولي تقريبا وكنت بحماس اذكر تجربتي وحشاركها معكم حتى تعم الفائدة.

طبعا مثل ماذكرت دائما الي يصير مع كثير منا إشتراك لفترات مختلفه ناس تروح وناس لا، وناس تجبر نفسها تكمل عشان دفعت إشتراك وناس تقول عادي خل يخلص الاشتراك ماحروح، وبإختلاف كل الحالات، مع ذكر شغلة مهمة انا مايهمني ان اطلع من البيت عشان جو الجيم ومايهمني استخدم أجهزة...الخ من المعدات والأدوات تبع النادي فكان عادي ابدأ من البيت عشان اتأكد هل عندي احساس الإستمرار، أو لا حيكون مثل الأهداف الي نكتبها كل سنة.

وفعلا بديت بس السر كان بالبرنامج الي إستخدمته (أحب أقول إن حديثي عن البرنامج ليس دعاية مدفوعة ولكن لمشاركة التجربة).

البرنامج قلت عنه لكل أحد كان يسألني عن التغير الي طرأ علي او يسأل عن برامج كويسه او حتى اذا انفتح موضوع الرياضة بشكل عام.

اسم البرنامج Workout Women ولون الأيقونة بينك واتوقع فيه للرجال. طبعا مايحتاج له إشتراك مالي او أي شي فقط تسجل وتبدأ. بيعطيك أنواع مختلفة من الرياضة. الجميل فيه إن ممكن تختار المنطقة من الجسم الي حاب تشتغل عليها. والجميل ان يأخد من يومك فقط 7 دقائق. اي نعم 7 دقائق وتشوف النتيجة بعد فترة، من 3 اسابيع الى شهر ومو لازم كل يوم ممكن يوم بعد يوم او تكتفي ب 3 ايام بالإسبوع. كمان بيتابع التطور من وزن والايام الي بتعمل فيها الرياضة. ممكن يكون فيه خصائص تانية اذا جربتوها ممكن تشاركونا النتيجة. كذلك في جزيئات كبرامج ممكن تكون مدفوعة اذا حابب تاخدها ككورس تشترك معاهم فيها.

وأخيراً، العبرة بالنتيجة وحقيقي مريح بسيط مايأخد وقت من يومك وحتلاحظ ومن حولك كذك النتيجة. أتمنى ان أكون أضفت لكم شي وربي يمتعنا جميعاً بصحة وعافية.

لينك البرنامج للتحميل على ايزو:

https://apps.apple.com/us/app/workout-for-women-fitness-app/id839285684

لينك البرنامج للتحميل على جوجل بلاي:

https://play.google.com/store/apps/details?id=net.workoutinc.seven_7minutesfitness_forwomen&hl=en&gl=US

دمتم بود،

نبال