صيدلية اونلاين

في فترة الحظر من الأشياء يالي اضطريت عليها شراء الاونلاين طبعا كانت خبرات منها السعيد ومنها الي يعصب كثير. السعيد لما كانت توصل المنتجات بسرعة وأنبسط كثير عليها، والي توصل متأخرة وتعصبني. أتعلمت من الخبرة دي كثير حتى إني أتعلمت لما يطولو لأول مره في حياتي أتواصل مع هيئة الإتصالات وأشتكي من التأخير. هو موحلو نشتكي بمعنى نشتكي بس تحس أنو تبا حقك كمشتري، عميل أو زبون، ومنها تساعد المكان يالي أشتريت منه بتحسين تجربة العميل ودا من الأشياء المهمة جدا عشان اي منشأة تستمر..  

نرجع لموضوعنا، أتعرفت خلال الفترة دي على حساب الأستاذ فهد البقمي وأحب اشكره على كل جهوده المبذولة في العطاء في مجال الشراء أونلاين ري يسعده ويوفقه.

أول موقع طلبت منه هو صيديلة فرنسية إسمها، كوكون سنتر، دا الربط تبعهم، https://www.cocooncenter.co.uk/ و الصيدلية التانية هي صيدلية يونانية إسمها، بست فارمسي ودا الرابط تبعهم، https://2u.pw/ty5JH الصيدليتين عندهم كل المنتجات الي نحبها ونستخدمها كمستهلكين سعوديين، مثل بايوديرما، فيتشي، سيتافيل، كيوفي وغيرها كثير.

(ملاحظة، للإنتقال لصفحة الصيدلية الرجاء الضغط على رابط الصيدلية بالأعلى)

طيب يا نبال ليش أشتري و أتعب ماخلاص أشتري من هنا وأخلص أو أطلب أونلاين من هنا من السعودية؟ ,تكاليف الشحن حتكون نفس زيادة الأسعار؟ و و و تساؤلات كثير، حجاوب على التساؤلات الي كانت ببالي كمشتري لأول مره جرب يشتري أغراض الصيدلية أونلاين.

أحب أجاوب على دي الأسئلة من تجربتي الخاصة لمدة أربع شهور مع الصيدليتين الفرنسية واليونانية، كالتالي:

- المنتجات الموجودة عندهم تقريبا تطلع عليك بسعر الجملة حتى لو زدت سعر الشحن برضو تطلع عليك ارخص تقريبا بنص السعر

- الصيدلية الفرنسية في بعض المنتجات ما توصل للسعودية مثل بايوديرما وفيتشي بس لها طريقة بالنسبة لي متعبة شوي وما احب الخبط وأضيع نفسي فلقيتها في بست فارمسي اليونانية وطلبتها من عندهم فممكن تعتمدهم الأتنين أو الي تفيدك حسب المنتجات الي تستهلكها

- مدة التوصيل دي لوحدها حكاية بس لما تفهمها وتشوف الخبرات السابقة تكون أسهل بالنسبة لك

- أحب أقول انو لو طلبت أونلاين من السعودية برضو ممكن توصل بعد شهر دا لنقطة تأخير التوصيل

- في خيارات شحن متعددة للسعودية طلبت من البريد السعودي مرتين ومن دي اتش ال 3 مرات

- البريد السعودي عادي توصل بعد شهر، الدي اتش ال مره بعد تلاته ايام بالزبط ومره بعد اسبوع ومره بعد اسبوعين، طبعا خيار الدي اتش ال افضل بكتير

طريقة الطلب

طريقة الطلب جدا سهلة، نفس طريقة طلبات الاونلاين بالسعودية وخارجها، أختصرها بالخطوات التالية:

- تسجل بموقهم وتعبي كل البيانات المطلوبة

- تتأكد من العنوان أنو عنوانك الوطني و أكيد تتأكد من رقم التليفون، (معلومة مهمة عن البريد السعودي، أن لو طلبت و وضعت عنوان غير عنوانك الوطني، برضو حتروح الأغراض للعنوان الوطني الي مسجل عندهم فحلو تتأكد لما توصل عندهم إيش العنوان الي حيوصلو عليه، طبعا دي المشكلة سارت لي وحبيت أنوه عنها)

- بعد التسجيل، تروح تختار منتجاتك عددها وتحطها بالسلة

- ثم تعمل خروج عادي تختار طريقة التوصيل وتتأكد من عنوانك منتجاتك

- ثم تدفع عادي، حيرسولك ايميل تأكيد

- بعد كده ممكن تتابع طلبيتك من خلال حسابك، وبس جدا سهل

بالنسبة لموضوع تأخير الطلب عملت خطة داخلية لي لترتيب موضوع طلبات الصيدلية فادتني كثير، سرت ازور الصيدلية في السعودية فقط لشراء الأدوية والأشياء الي مرة تكون ضرورية فقط. غير كده مرة بالشهر أشتري كل الإحتياجات من العناية بالبشرة والجسم، الفايتمينات، (شامبو، شور جل، كريمات بشرة ...الخ) بأسعار وأحجام خيالية وبعضها مو موجود أصلا ولا متوفر عندنا بالسعودية وحقيقي ارتحت على الطريقة دي كثير.

وبكدة أتمنى أكون غطيت تجربتي بكل التساؤلات الي ممكن تجي ببالكم وإذا في أي تساؤلات تانية، أنا بين يدينكم للإجابة عليها..

دمتم بود،

نبال